West Bank-д масктай этгээдүүд Европын дипломатуудын цуваа руу халдаж, Израиль шалгалт эхлүүлэв

Тайбе тосгонд юу болов

Төлөөлөгчид Рамалла хотын ойролцоох, ихэнх оршин суугчид нь христийн шашинтай Тайбе тосгонд очиж, чидун хураалтын үеэр палестин тариаланчид руу суурьшигчид бараг өдөр бүр халдаж буй нөхцөл байдалтай танилцаж байсныг BBC мэдээлэв. Бельгийн Гадаад хэргийн сайд Максим Прево X сүлжээнд бичсэнээр, халдлагад Бельгийн Иерусалим дахь Ерөнхий консул, Франц, Польшийн дипломатууд, Католик сүмийн төлөөлөгчид өртөж, Францын нэгэн хотын дарга зодуулж, Бельгийн машин эвдэрсэн боловч Бельгийн баг эсэн мэнд байна.

Израилийн Армийн радиод өгсөн гэрчүүдийн мэдүүлгээр, дөрвөн дугуйт мотоцикльтой, нүүрээ далдалсан долоон суурьшигч цувааг бүсэлж, бичиг баримт шаардаад Бельгийн консулын газрын машины цонхыг хагалсан гэж The Times of Israel бичжээ. Олон нийтийн сүлжээнд тарсан бичлэгт масктай хүмүүс цуваа руу ойртож, машин руу чулуу шидэж буй, Францын туг өнгийн туузтай нэгэн эр машины дэргэд газар суусан байдалтай харагдаж байна. Ольнуа-Эмери хотын дарга Бернар Боду AFP агентлагт өгсөн ярилцлагадаа өөрийг нь өшиглөж, төмөр саваагаар зодоод газар унагасан гэж ярив. «Тэнд юу болж байгааг бүх дэлхий мэдэх ёстой» гэж тэрбээр хэлжээ.

Израилийн хариу үйлдэл

Израилийн арми (IDF) Тайбе орчимд дипломат төлөөлөгчид «израилийн үймээн дэгдээгчдийн» халдлагад өртсөн «ноцтой хүчирхийллийн үйлдлийг» эрс буруушааж байгаагаа мэдэгдэв. Армийн урьдчилсан шалгалтаар халдлагын үеэр газар дээр цэргийн алба хаагч байгаагүй бөгөөд айлчлалыг армитай урьдчилан зохицуулаагүй байжээ. Цагдаа бичлэгийг хүлээн авмагц мөрдөн шалгалт эхлүүлж, хохирогчдоос мэдүүлэг авах, сэжигтнүүдийг тогтоох ажиллагаа явуулж байгаа гэв. Гадаад хэргийн сайд Гидеон Саар хүчирхийллийг эрс буруушааж, холбогдох орнуудын элчин сайд нартай холбоотой байгаа ч айлчлалыг армитай зохицуулаагүй нь харамсалтай гэж мэдэгдэв.

Харин Ерөнхий сайд Биньямин Нетаньяхугийн алба дипломатуудын эсрэг аливаа хүчирхийллийг хүлээн зөвшөөрөхгүй гэдгээ илэрхийлсэн ч дүгнэлт хийхдээ болгоомжтой хандахыг уриалав. Тус албаны мэдэгдэлд олон нийтийн сүлжээн дэх зургууд үйл явдлын бүрэн дараалал, хувь хүний хариуцлагыг тогтоохгүй гэж үзээд, эдгээр мэдээлэл чидун хураалтын үеэр Израилийг гутаах «зохион байгуулалттай кампанит ажлын» үеэр гарч байна гэсэн болгоомжлолыг дурджээ.

Европын шаардлага

Прево Израиль эзлэн түрэмгийлэгч гүрний хувьд палестинчууд, дипломатууд, сэтгүүлчдийн аюулгүй байдлыг хангаж, буруутныг шүүхэд шилжүүлэх үүрэгтэй гэж мэдэгдээд, хүчирхийлэл үйлддэг суурьшигчид болон тэднийг дэмжигчдэд Европын холбооны хориг арга хэмжээ авахуулахаар Бельги шахалт үргэлжлүүлнэ гэв. Францын Гадаад хэргийн сайд Жан-Ноэль Барро Израилийн эрх баригчдыг буруутнуудыг баривчилж, «гэмт хэргийн шинжтэй хүчирхийллийг» яаралтай зогсоохыг шаардав. Польшийн Гадаад хэргийн яам өөрийн төлөөлөгчид гэмтээгүй, тэднийг тусгайлан онилсон шинж тэмдэг одоогоор алга гэж мэдэгдээд, урьдчилсан мэдээллээр халдлагыг израилийн суурьшигчид үйлдсэн байж болзошгүй хэмээн буруушаажээ.

Чидун хураалтын улиралд хурцадмал байдал

Энэ халдлагаас өмнөх өдөр буюу 10-р сарын 16-нд West Bank-ийн өөр нэгэн тосгонд суурьшигчдын халдлагаар The Washington Post сонины гэрэл зурагчин Хайди Левин болон хэд хэдэн палестин хүн гэмтсэн юм. АНУ-ын Төрийн нарийн бичгийн дарга Марко Рубио энэ халдлагыг «сэтгэл түгшээсэн» гэж нэрлэжээ. Мөн 10-р сарын 17-нд Хевроны өмнөд хэсэгт орших Масафер Ятта орчимд суурьшигчдын халдлагаар дөрвөн эмэгтэй, нэг хүүхэд зэрэг зургаан хүн гэмтсэн гэж Палестины Улаан хавирган сар нийгэмлэг мэдээлснийг Al Jazeera дамжуулав.

Европын зөвлөл баасан гарагт нийтэлсэн хурлын дүгнэлтдээ Израилийг суурьшлын бүсээ тэлэх шийдвэрээ, тэр дундаа Иерусалимын зүүн талд орших E1 бүсэд барилга барих тендерээ эргүүлэн татахыг уриалсан бөгөөд тус тендерийн санал авах хугацаа 10-р сарын 19-нд дуусна гэж The Times of Israel бичжээ. Израильд 10-р сарын 27-нд парламентын сонгууль болно.