Ромын Пап Лео XIV уушгины хорт хавдрын мэс заслын дараа эмнэлгээс гарч, Ватиканд буцав

Эмч нар эмнэлгээс гаргахыг зөвшөөрөв

Пап ламын хувийн эмч Луижи Карбоне болон Жемелли эмнэлгийн цээжний хөндийн мэс заслын тасгийн эрхлэгч, профессор Стефано Маргаритора нарын мэдэгдэлд дурдсанаар, Бямба гарагийн өглөө хийсэн цусны шинжилгээ, цээжний рентген зураг болон эмнэлзүйн байдлын үнэлгээгээр Пап ламыг эмнэлгээс гарах боломжтой гэж үзжээ.

Ватиканы мэдээлснээр, Лео XIV эмнэлгийн 10 давхарт өөрт нь зориулан бэлтгэсэн өрөөнд Ариун Мисс үйлдсэний дараа мэс засал хийсэн профессор Маргаритора болон эмч, сувилагчдад талархал илэрхийлж, Ариун Зүрхний Католик их сургуулийн ректор, профессор Елена Беккалли болон эмнэлгийн удирдлагуудтай мэндэлжээ. Reuters агентлагийн мэдээлснээр, 71 настай Пап лам машин руугаа бусдын тусламжгүй алхаж очоод, эмнэлгийн гадаа цугласан хүмүүст гар даллажээ.

Мэс засал ба онош

Ватиканы мэдээлснээр, Пап лам 10-р сарын 11-ний Ням гарагийн залбирлын үеэр ердийн үзлэгээр уушгинд нь эрт үе шатны жижиг зангилаа илэрсэн тул мэс засал хийлгэнэ гэж өөрөө олон нийтэд зарласан байв. Мөн сарын 13-ны Мягмар гарагт хийсэн мэс заслаар видео дурангийн аргаар баруун уушгины доод дэлбэнг бүхэлд нь авсан бөгөөд мэс заслын явцад хийсэн эд эсийн шинжилгээгээр уушгины аденокарцинома буюу хорт хавдрын оношийг баталсан гэж эмч нар мэдэгдсэн. Пап лам хагалгааны өрөөнд гурван цаг орчим байсан бөгөөд мэс засал өөрөө 90 орчим минут үргэлжилж, хүндрэлгүй амжилттай болсон аж.

Reuters-ийн мэдээлснээр, эмч нар хавдрын хэмжээ болон ойролцоох тунгалгийн булчирхайд тархсан эсэхийг одоогоор олон нийтэд мэдээлээгүй байна. NBC News-ийн бичсэнээр, цаашид нэмэлт эмчилгээ шаардлагатай эсэх талаар эмч нар ямар нэг мэдээлэл өгөөгүй байна.

Ажлаа үргэлжлүүлж буй ч ачааллаа зохицуулж магадгүй

Пап лам эмнэлэгт байхдаа ажлаа үргэлжлүүлсэн бөгөөд Баасан гарагт (10-р сарын 16) ОХУ-ын Ерөнхийлөгч Владимир Путинтэй утсаар ярьжээ. Гэгээн Ширээний хэвлэлийн албаны мэдэгдэлд дурдсанаар, Пап лам Херсон мужийн Олешки хотын хүмүүнлэгийн байдалд гүнээ санаа зовж буйгаа илэрхийлж, хүнс, эм тариа хүргэх, энгийн иргэдийг сайн дураар, аюулгүй нүүлгэн шилжүүлэх боломж олгохын тулд гал зогсоохыг уриалсан байна. Кремлийн мэдээлснээр, Путин энэ чиглэлийн хүчин чармайлтыг дэмжиж буйгаа илэрхийлжээ.

Ватикан Пап ламын 11-р сарын 6-17-нд Уругвай, Аргентин, Перу улсад хийх айлчлалын бэлтгэл ажил «үргэлжилж байна» гэж мэдэгдсэн гэж Reuters мэдээлэв. Харин Ватиканы Төрийн нарийн бичгийн дарга, кардинал Пьетро Паролин Пап лам цаашид ажлын хуваарийнхаа хэмнэлийг «эрүүл мэндийн байдалдаа тохируулан» өөрчлөх шаардлагатай байж магадгүй гэж хэлсэн байна.

Дараагийн алхам

2025 оны тавдугаар сард сонгогдсон, дэлхийн 1.4 тэрбум католик шашинтны тэргүүн Лео XIV Ням гарагийн үд дунд (Улаанбаатарын цагаар 18:00 цагт) Апостолын ордны цонхноос «Angelus» залбирлыг удирдана гэж Ватикан мэдэгдэв.