УИХ-ын гишүүн Б.Жаргалан: Төсвийн хэлэлцүүлэгт сайд нартай «нэлээд ширүүн маргалдлаа»

Б.Жаргалан бичвэрээ «Энэ удаагийн төсвийн хэлэлцүүлэг тун хүнд уур амьсгалд өрнөж байна» гэж эхэлжээ. Тэрбээр юмны үнэ өсөж, өрхийн орлого амьдралд хүрэлцэхээ больсон, зунаас хойш шатахуун хомсдож иргэд хэдэн цагаар дараалалд зогссон зэргийг дурдаад, «Нийгэм бухимдалтай байгаа ийм цаг үед Улсын Их Хурал төсөв хэлэлцэж байна» гэж бичжээ. Түүний бичсэнээр, иргэд, аж ахуйн нэгжүүд хөдөлмөрлөж олсон мөнгөөрөө татвар төлж байгааг бодохоор төсвийн үрэлгэн зардлуудыг хараад «зарим зардлын үндэслэлийг асуумаар, заримыг нь бүр хасмаар» санагддаг аж. «Энэ удаагийн хэлэлцүүлгийн үеэр хэд хэдэн сайдтай нэлээд ширүүн маргалдлаа» гэж тэрбээр бичжээ.

Ж.Энхбаяр: «Билгийн нүдээ нээ»

Б.Жаргалангийн бичсэнээр, тэрбээр Эдийн засгийн байнгын хорооны хуралдаан дээр МАН сүүлийн арван жилд 205 их наяд төгрөгийн төсөв захиран зарцуулсан ч «нүдэнд үзэгдэх, гарт баригдах зүйл алга» тул ядаж Оюу толгойн ногдол ашгийг Хуримтлалын санд нь үлдээхийг хүссэн утгатай зүйл ярьжээ. Үүнд Эдийн засаг, хөгжлийн сайд Ж.Энхбаяр «Билгийн нүдээ нээ, болж бүтэж байгаа өчнөөн сайхан юмыг олж харж чадахгүй байна» гэж түүнд уурласан гэж тэрбээр бичжээ. «Сүүлдээ бүр миний ёс зүй, хүмүүжлийг хүртэл ярих шиг болсон» гэсэн Б.Жаргалан сайдыг «бүх зүйл болж бүтээд байгаа параллель ертөнцөд амьдардаг аятай» хэмээн шүүмжилжээ.

З.Мэндсайхан: «Чи төсөв татуулдаг хэн бэ?»

Төсвийн байнгын хорооны хуралдаан дээр тэрбээр З.Мэндсайхан сайдаас Оюу толгойн ногдол ашгийн талаар санал асуулга явуулж буй зорилго, төсвийг аль хэдийн УИХ-д өргөн мэдүүлчихсэн байхад иргэдийн саналыг хэрхэн тусгах, мөн хөрөнгө оруулалт хийхгүй гэсэн санал гарвал төсвөө татаж авах эсэхийг асуусан гэж бичжээ. Түүний бичсэнээр, хариуд нь «Чи төсөв татуулдаг хэн бэ?» гэдэг үг сонссон аж. «Санал асуулга явуулж байгаа зорилго нь маш ойлгомжгүй байсан учраас гайхаж асуусан юм л даа. Харин сайд тодорхой хариулж чадсангүй» гэж Б.Жаргалан бичээд, «Магадгүй өөрөө ч зорилгоо ойлгоогүй болов уу» хэмээн нэмжээ.

«Гэрт ойрхон сургууль»: 14 тэрбум төгрөгийн түрээсийн зардал

Түүний бичсэнээр, гурав дахь маргаан «уржигдар» УИХ-ын чуулганы танхимд Боловсролын сайд Л.Энх-Амгалантай «Гэрт ойрхон сургууль» хөтөлбөрийн түрээсийн зардлаас болж өрнөжээ. Б.Жаргалан өмнө нь боловсролын салбарын төсвийг хасах санал огт гаргаж байгаагүй, харин энэ салбарт илүү их хөрөнгө оруулах ёстой гэж боддог гэдгээ онцолжээ. Энэ удаад «уг хөтөлбөрийн санхүүжилттэй холбоотой ашиг сонирхлын зөрчил байж болзошгүй талаар мэдээлэл гарсан», энэ талаар Боловсролын яамнаас хангалттай тайлбар авч чадаагүй гэж тэрбээр бичжээ. Ингээд татвар төлөгчдийн мөнгийг «болзошгүй авлига, ашиг сонирхлын зөрчлөөс хамгаалах зорилгоор» 14 тэрбум төгрөгийн түрээсийн зардлыг төсвийн тодотголоос хасах санал гаргасныг УИХ-ын гишүүд дэмжсэн гэж Б.Жаргалан бичжээ. Ашиг сонирхлын зөрчил байж болзошгүй гэдэг нь түүний бичвэрт дурдсан сэжиг бөгөөд Press Center үүнийг бие даан баталгаажуулаагүй болно.

Б.Жаргалангийн бичсэнээр, сайд Л.Энх-Амгалан түүнийг олон мянган хүүхдийн сурч боловсрох эрхэд халдсан гэж буруутгажээ. Үүнд тэрбээр «Хүүхдийн сурч боловсрох эрхийг хангах, түүнд шаардлагатай санхүүжилтийг хууль ёсны дагуу төлөвлөж, зарцуулах нь Боловсролын сайдын өөрийнх нь үүрэг шүү дээ» гэж бичээд, «Төсвийн зарцуулалтын үндэслэлийг асуусан намайг элдвээр буруутгаж, чуулганы танхимд орилох хэрэг байсан л юм байх даа» хэмээжээ.

«Чимээгүй болж болохгүй»

Б.Жаргалан бичвэрийнхээ төгсгөлд УИХ-ын гишүүд Засгийн газрын үйл ажиллагаанд хяналт тавих, асуулт асуух, шаардлага тавих, төсөвт өөрчлөлт оруулах санал гаргах бүрэн эрхтэй гэдгийг сануулжээ. «Сайд нарын байр суурь гишүүдийн саналтай зөрж болно. Миний асуулт, дүгнэлт ч алдаатай байж болно. Тэгвэл үндэслэлээр нь няцаана биз» гэж тэрбээр бичсэн байна.

Тэрбээр өөрийгөө «энэ бүхний дунд улам хурцлагдаж байх шиг» байна гээд, УИХ дээр сайд нартай маргалдаж, сошиал орчинд хувь хүн рүү чиглэсэн дайралтад өртдөг, «заримдаа хана мөргөж байгаа мэт мэдрэмж төрнө» гэж бичжээ. «Гэхдээ асуух ёстой зүйлээ асуухаа, шалгах ёстой зүйлээ шалгахаа больж болохгүй, чимээгүй болж болохгүй» гэсэн Б.Жаргалан иргэдийн өмнөөс хяналт тавих үүрэг хүлээсэн учраас «яаж ч дайруулж байсан» энэ үүргээ биелүүлж, нийтийн эрх ашгийн араас явах ёстой гэдгээ улам сайн ойлгож байгаагаа бичжээ.

Энэ мэдээг нийтлэх үед Б.Жаргалангийн бичвэрт дурдсан сайд Ж.Энхбаяр, З.Мэндсайхан, Л.Энх-Амгалан нарын хариу тайлбар Press Center-т олдсонгүй.